أعمدة

ام اسماعيل تكتب في (بالدارجي كدا)… الذباب والباعوض في وضع الاستعداد

وكالعادة جاء الخريف والذباب والباعوض في وضع الاستعداد للهجوم … والباعوض سباق وبلعب ضاغط ليل ونهار يبدو إنه بكامل لياقته … والذباب كعادته يتسابق في حشد وظهور بعض المحترفين أصحاب الحجم الاكبر واللون الاخضر … مااقوله ليس من باب المزاح أو نكات في الجوالات هذا واقع ولاية الخرطوم الحزين فبعد الامطار الجميله النهارية وظهور الثلوج في بعض المناطق وفرح الأطفال والكبار ولم تمضي دقائق من الفرح حتى عاد الوجم الا ظهرت الكوارث حقاً الحزن يليق بنا فرح شنو ومطر شنو كوارث على التوالي بداية بسقوط اللافتات علي السيارات … ودا إسمه إهمال مزدوج من جانب المحلية الماراجعت اللافتات والاعمدة الخلخلوها الثوار … القلعوا قلعوا وخلوا الباقي يرجف زي كرعين العجوز ومن أول عاصفة رقدوا قصب ، والجانب التاني المواطن معقوله بس ! كلكم موقفين عرباتكم تحت الشجر واللافتات !!! … اللافتات دي زمااان أمرها انتهى واصبحت آيلة للسقوط في اي وقت وقد كان … والشجر دا من صغار قالوا ليكم المط وقت تصب يا بقع يا بولع بسبب الصواعق كلام واضح وبالدارجي كدا … الناس تاخد حزرها ما يبقى علينا غياب حكومة واستهتار مواطن وربنا يهون عليكم في كل تلف خلف …
اه ياناس المحليات ويا حكومة ولاية الخرطوم وقت الاطراف غرقت ماشفنا ليكم إستعداد في الخرطوم غايتو النصيحه جماعة منسوب النيل كدا بوينت كدا وقل بنسبة كدا من العام الماضي و و … غايتو ديل نشيطين بس الكلام دا رسلوا للمحليات تعمل إستعداد للناس الفي أطراف النيل نحن المواطنين مابنستفيد شئ … والحزن كله لناس الخرطوم واجهة البلاد … النصيحه مافي اي علامة من علامات العاصمة مافي مكان ما اتملاء مويه مطر من المطار مرورا بالاستاد والوزارات والجامعات … الشوارع والاسواق دي حدث ولا حرج حاله يغني عن سؤالها … غايتو المواطن اتصالح مع الوضع خايضين في المويه والطين … المشكله وين في أسراب الذباب والباعوض والذباب وحدة ينقل قرابة الخمسين مرض اشهرها التايفويد والدسنتاريا وغير البعوض والملاريات بأنوعها … وكالعادة حننتظر الوضع حتى يصبح وباء ويظهروا ناس محافحة الملاريا وناس الناموسيات و و و …. ولا كلو بعد الفاس تقع في الراس … نحن نكافح الباعوض بدل الملاريا وفروا (زيت راجع) ساي يا حكومة نرشوا في المويه دي وقت ما بترشوا بالطيارات … انقذونا من الذباب دا غلبنا عديل نص سكان العاصمة عندهم تايفود والباقين ملاريا ….
الوضع متأزم يا محليات وبالدارجي كدا هبوااا من أجل صحتكم …
الذباب حيرنا ولعنا ليه دخان نيم وطلح وكل أشكال المبيدات … يزوغ بجاي جاي التقول طالع موكب

*خالص إحترامي*
*🖋 أمإسماعيل*

إنضم الى مجموعتنا على الواتس آب

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى