عز الكلام أم وضاح حتماً سيسألكم الله !!!!
اعتقد أن البلد قد وصلت للحد الذي يجعل كل شخص يتحسس خوفه من المصير الذي ينتظرها وان كان السياسيون بعيداً عن الشارع ولايعلمون أنه مرجل يغلي فهي مصيبه لأن الناس ماعاد لديها ماتخسره وقد خسرت كرامتها وصحتها وأدميتها!! وأن كان الساده في قيادة الدوله لايعلمون أن البلد علي وشك الانهيار والفوضى قد ضربت أطنابها في كل المؤسسات فهذه مصيبه كبيره تانيه وكدي أقول ليكم انا عايزه واحد من هؤلاء السياسين وقادة الاحزاب والمدورين فينا حديث عن الوطنيه والوطن والمواطن يجاوبني البلد دي ماشه علي وين؟ الحل شنو ؟حتي نخرج من هذه الورطه الكبيره التي علقنا فيها انا عايزه واحد من قادة الحركات المسلحه الذين جاء بهم استحقاق السلام واكتفوا حتي الان بما وفرته لهم الحكومه من بيوت فارهه وعربات مكندشه وأصبحت قضيتهم قطر وكاس العالم كماهو مناوي مشغول هذه الايام ونسوا قضيتهم الاساسيه قضيه انسان الهامش المظلوم ظلم الحسن والحسن انا عايزه أسألهم البلد دي ماشه علي وين ؟وشنو رؤيتهم للخروج من هذه الازمه؟ شنو الحلول المطروحه لتتفادي حرب أهليه تغذيها الكراهيه والعنصريه؟ شنو رؤيتهم لرفع الهمم وليعرف البني ادم السوداني أن الوسيله الوحيده للخروج من ألازمه أن يصبح منتجاً ومعتمداً علي ضراعه؟؟ انا عايزه أسال قيادة البلد وعلي رأسها الفريق أول البرهان البلد دي ماشه علي وين ياسعادتك ؟؟ماالذي تنتظره لتقوم بدورك الذي وضعتك فيه الاقدار لتحافظ علي تماسك الامه وتحفظ لها شرفها من العبث والاستهبال الذي يمارسه البعض علي عينك ياتاجر وانت تعلم ذلك ؟؟ انا عايزه اسالك ياسعادتك انت منتظر شنو لتشكل حكومه مسؤوله تدير شؤون البلد ؟؟منتظر شنو وقحت أنكشفت لدي الشعب السوداني وهزمت نفسها بنفسها وقد قدمت نموزجاً فاشلا في الحكم ؟منتظر شنو والمجتمع الدولي المشغول بمشاكله وازماته الاقتصاديه اعترف بك علي العلن ؟ منتظر شنو وقد تكاملت مبادره كبيره كمبادرة الخليفه الطيب الجد وأصبحت أرضيه خصبه لتوافق وطني إلا لمن أبي ولم تتنزل مخرجاتها الي أرض الواقع وراحت المليارات التي دفعت فيها شمار في مرقه ؟؟ منتظر شنو ياسعادتك والبلد كل يوم في أضرابات ؟ منتظر شنو ياسعادتك والغلاء طحن الناس ؟ منتظر شنو ياسعادتك والشعب السوداني تحول الي شعب حزين وتعيس مافي زول عنده نفس لأي حاجه والناس من اصبح همها تاكل شنو تشرب شنو وتصل نص الشهر كيف؟ اعتقد أننا قد تعدينا مرحلة أن نحزر من الخطر لأننا الان في قلب العاصفه تقذف بنا يميناً ويساراً والقادم أسوأ وواضح أنه مافي زول جايب خبر أو أن هناك من يريدها أن تصل لمرحلة الحريق وعندها لن نجد وطناً نبكي عليه كلمه عزيزه أمس عاني المواطن من انقطاع الكهرباء وانقطاع المياه وتوقف الشبكه في كثير من المؤسسات والخدمات بمافيها خدمة بنكك لكننا حمدنا الله كثيراً أن الاوكسجين ليس من مسؤوليات الحكومه وإلا كان الضحك شرطنا كلمه أعز بلد من غير وجيع #-أم وضاح
