اسماعيل التاج يكتب : كأس العالم .. ٠٠بدون زعل

ماذا لو أتيحت لسودانيين من مشارب شتى التعليق على نهائي كأس العالم بقطر وفوز الأرجنتين؟
التعليقات حتكون كيف؟

عمر الدقير: المجد لضربات الترجيح. لقد انتصرت موسيقى التانغو الحالمة على المياه الزرقاء اللازوردية المتماهية مع شواطيء الريفيرا الفرنسية.

مني مناوي: في اهداف سرية تحت الطربيزة ح تظهر في الكأس الجاية.

اردول: إقصاء فرنسا في النهائي بضربات الترجيح يؤكد على نهج الإقصاء البتمارسو الفيفا بسبب الأصول الأفريقية لمعظم لاعبي فرنسا.

ترك: الكأس دا اساساً بتاع البشاريين. البشاريين هم اصحاب الحق في البطولة ولو عاوزين نقفل البطولة الجاية حنقفلها.

بشرى الصائم: ارجنتين إيه؟ سيبك منها. انا واحد من تلاتة أسسنا الفيفا.

م. ج.ه (MJH): كيف يكون دور نهائي؟ عاوز اعرف اللعبوا في التمهيدي منوا؟ عاوز اعرفهم لاعب لاعب، منتخب منتخب، دولة دولة، زنقة زنقة. فتشت في الفيفا و الكاف والكونكاكاف واليوويفا والآسيان وأوقيانوسيا وما لقيت اجابة.

خبير استراتيجي: في شنو؟ انا ما عارف الموضوع بالضبط شنو، لكن ما دام جابوا سيرة الارجنتين معنى كدا الموضوع عن حرب الفوكلاند، وبالتالي أحب التأكيد على إنو بريطانيا و …. لاب لاب لاب

جبريل: 4 طويلة دي تلقاها في كل حتة؟ ظل كأس العالم مختطف من 4 طويلة لمدة 36 سنة (المانيا، ايطاليا، فرنسا، البرازيل).

مبارك الفاضل: طلبنا بتاع الإنضمام للولايات المتحدة والمكسيك وكندا عشان ننظم معاهم النسخة القادمة لكأس العالم في 2026 ، كان مجرد بالونة اختبار.

فوزي بشرى: ‏جاءت بهم الدوحة، و الزمان بطولات، و جاء بهم إغواء الكؤوس و الزمان منافسة، فأقاموا مناصرين للإبداع، باذلين أنفسهم للجمال، بعد أن عزت على الأرجنتين منصات التتويج.

دسيس مان:
ميسي مَسساً مَسسا
هبش الكأس هَبشاً هَبشا.

ود اللمين: ميسي أعاد ترتيب المشهد الكروي في أمريكا اللاتينية بعد 36 عاما. عشان كدا انا متفائل وما مستعجل. خخخخخخ

المنصورة: نقول للحبيب ميسي ما قصرت.

حميدتي: ياخي ما تدخلونا في مشاكل. انا بس قالوا لي تعال شوف التِيوَة دي. وقعدت شاهدت التيوة، مجبورين كراعنا فوق رقبتنا.

حميدتي: والله، والله، الارجنتين دي دي تاني ما نلعب معاها في بطولة واحدة. إن شاء الله تمطر تانغو.

عقار: انا شاهدت المباراة بس عشان ما أشق الصف.

أبو سبيحة: من حيث الشكل، البطولة كلها ما قانونية. كيف يعني تكون في شهر 12 وما شهر 6.
ح نشطب كل نتائج كأس قطر ونعتمد نتائج كاس 2018 في روسيا.

وجدي: لن تمر مسرحية الضربات الترجيحية.
القيادي إسماعيل التاج
يكتب كاس العالم بدون زعل