صبري العيكورة يكتب: حميدتي … سافر و جاء بقلم / صبري محمد علي (العيكورة)
أمسية امس الاربعاء عاد السيد نائب رئيس مجلس السيادة والوفد المرافق له من رحلته لروسيا التى اثارت جدلاً واسعا فى الاوساط الاعلامية والسياسية بسبب التوقيت رغم التأكيدات الحكومية بأن هذا التوقيت كان مضربا قبل اندلاع الحرب الروسية الاوكرانية .
السيد حميدتي هناك (برضو ما قصر) قال من حق روسيا ان تدافع عن مواطنيها و اراضيها . (الجماعة هنا) فى الخرطوم سفراء الدول الاوروبية ودول الترويكا (الفار لعب فى عبهم) فلفوا عممهم وذهبوا لوزير الخارجية المكلف السفير على الصادق طالبين منه اعلان إدانه واضحة للعدوان الروسي ولم يخلو الطلب من التهديد الاقتصادي
(عمنا) على الصادق سقاهم الشاي وقال (إن السودان يدعو الطرفين للجلوس والتحاور سلميا ) يعني وزير خارجيتنا جهجهم (يا ريتهم كانوا ما جوه) . إذا فشلت اول حصص رهن الارادة الوطنية للخارج بهذا الموقف المشرف (للخال) حميدتي و (لعمنا) على الصادق .
السيد حميدتي فى اول لقاء صحفي بمطار الخرطوم (جابا من الآخر) وطبعاً معروف عن الرجل ما عنده (كلام رمادي) فقال السودان يطمح لعلاقات خارجية تحقق مصالحه سواءا مع روسيا او غير روسيا ثم تساءل مستنكراً عن الاهتمام المتعاظم (بحكاية) القاعدة الروسية ببورتسودان واردف قائلاً أن هناك قاعدة روسية بدولة جيبوتي و دولة النيجر فلماذا تستنكرون ذلك على السودان ؟ قبل ان يقول ان هذا الملف هو من إختصاص وزير الدفاع (لكن نحن برضو بنشوف مصلحة السودان وين) ! ثم قال إن هذه القاعدة ستعود بفوائد لسكان شرق السودان الذين وصف حالهم ب (ما لاقيين موية زرقاء يشربوها) !
يا جماعة بالله عيبوا لى كلام الزول ده ؟ ما كلام زي العسل ! مصلحتنا وين دي البوصلة التى يجب ان نوجهها نحو من يحقق مصلحتنا .
يا جماعة كفانا (قلة ادب) الامريكان دعونا نجرب الشرق عموماً روسيا والهند والصين و ماليزيا واندونسيا فهؤلاء مشهود لهم بعدم التدخل فى الشأن الداخلي . (آآي نعم) ما كاتلاهم الامانة لكنهم افضل السيئين .
إذاً كلام (الخال) فى (حتة) روسيا دي انا شايفو عين العقل على الاقل يكون لدينا امل لعلاقات اقتصادية جديدة من ناس (شرق الله البارد) ونخرج من دائرة الصلف و الابتزاز الامريكي .
من المضحكات ان الشيوعية لدي الروس اصبحت تاريخا منسيا داخل المتاحف و(ناس) صديق يوسف والخطيب لافين بيها فى شارع الستين !
إمتناع السودان عن التصويت بالجمعية العامة للامم المتحدة على قرار يدين روسيا اعتقد انه حق تكفله قوانين المنظمة (مع ، ضد ، امتناع) فأين المشكلة هنا ؟ أعتقد أنه قرار صائب جسد عودة السيادة الوطنية للسودان . ورد جزءاً من الدين الروسي والصيني تجاه السودان و(ياما) دعموا السودان بالمحافل الدولية بل وما اكثر ما استخدت روسيا والصين حق النقض (الفيتو) لصالح السودان .
إذاً والله يا جماعة (الخال) ده انا شايفو ماش صاح ويجب أن يدعم وأى زول عندو كلام كده واللا كده مع ناس الدعم السريع يمشي القضاء ياخي . لكن بالجد الزول ده كل يوم يثبت انه (رجل دولة) !
التفلتات الامنية الحقنا يا حميدتي ، اللجنة الاقتصادية أدوها حميدتي ، مش عارف نزع السلاح شوفوا ناس حميدتي ، فيضان النيل والخريف الحقنا يا حميدتي ، (الكرونا) اول من دعم مراكز العزل هو حميدتي !
أها يا جماعة هو رجل الدولة ده كيفن يعني ؟ و يعني ناس البشير ونميري كان معاهم (ليسانس حقوق) ؟
قبل ما أنسي : ــــ
هيئة الدفاع عن وجدي صالح والطيب عثمان تقول ان (النيابة تنتهك حقوق موكلينا) !! بصراحة كده (لممن دمعت) إنتهاك مرة واحده ؟ (يا حراام) ! طيب والذين قضوا فى السجن ثلاثة سنوات بسبب لجنة وجدي يقولو شنو ؟ يا جماعة (أرجلو شوية) !
الانتباهة
